Tiedes het jaorlijkse Belfeldiabal is op vriedaag 17 Fibberwari Peter Görlach oetgeroope toet Prins van vv Belfeldia. In unne bomvolle kantine ging ’t daak draaf. Vergezeld van zien beide dochters as dansmerietje en zien damesteam as raod van 11 ging ut fies toet in de late eurkes door.
ZDH Prins Peter d’n twiede is getrouwd met Nicole en haet 2 dochters, Ella en Liza. Peter is in ’t dagelikse laeve Sales Manager beej Nedinsco. Det Belfeldia belangriek is in ’t laeve van ozze prins bliek wal oet het feit det hae trainer is van ’t damesteam, maedjes onger 17 en aan ’t begin van dit seizoen auch nach leider van ‘t 4e waas. Verder is hae medebestuurder beej Stichting Cultuur & Sport, un samenwerkingsverband met de hermenie. Dees stichting regelt de Belfeldse kermis en de jaorlijkse kermislaup. Ozze hoegheid wet van vastelaovend viëre is, want in 2001 waas hae al Brangkasmeister in café Juliana.
In de vreeje tied dae d’r den nach euver haet sjpeuld hae gaer un sjtökske meziek met joekskepel Och d’n Doedel, tevens ziene vrindegroep. Leuk detail is det juus oet deze groep dit jaor de Belhamelprins is gekaoze, Prins Ron d’n Ierste. Ut belaof dus unne sjoene vastelaovend te waere. Alaaf!
Klik heej veur de foto’s van deze sjoene aovend.